- TEATRO: Dura Lex a cargo de Volta e Dálle Teatro - Concello de Rianxo

A compañía Volta e Dálle Teatro, achégase ao Auditorio de Rianxo coa produción Dura Lex. A función terá lugar o vindeiro venres 30 de setembro ás 20.30 horas.

Está recomendada para maiores de 12 anos.

A entrada é de balde (ata completar aforo) e pode adquirse unha hora antes do comezo na billeteira do auditorio (máximo 2 por persoa)

Máis información no sitio web de Volta e Dálle Teatro

SINOPSE

O xuíz Salomón da Silva, natural de Nacente, aldea perdida no Souto da Retorta, convoca un acto promocional para presentar un invento revolucionario, a DURA LEX PRO 1.0, a máquina de facer xustiza. Víctima dunha conspiración urdida nas intrincadas canalizacións do poder xudicial, o xuíz Salomón da Silva quere redimirse dando a coñecer o froito de máis de vinte anos de traballo e investigación.

Entre as variadas prestacións do invento destaca a súa axilidade no procesamento de condutas delictivas, a súa economía de medios facilitada pola supresión de fiscais, avogados, procuradores e outros roles xurídicos, e a súa irreprochable imparcialidade mecánica. Ante a urxencia de reformas e recortes no eido xudicial, sancionada pola crise e a política gubernamental, o noso xuíz ofrece á sociedade a solución perfecta a todas as imperfeccións do sistema xudicial.