- Presentación do CURSO CAFD SOCORRISMO en espazos acuáticos naturais e instalacións acuáticas - Concello de Rianxo

Presentouse na Casa do Concello de Rianxo o CURSO CAFD DE SOCORRISMO en espazos acuáticos naturais e instalacións acuáticas, organizado pola Federación de Salvamento e Socorrismo de Galicia, coa colaboración do Servizo de Deportes e da Piscina Municipal de Rianxo.

A presentación correu a cargo de Adolfo Muíños, alcalde de Rianxo, Óscar Rial, director da Piscina Municipal de Rianxo, e Ramón Villanustre, técnico de Deportes do Concello de Rianxo.

Adolfo Muíños falou dos problemas que os concellos teñen para atopar persoal cualificado neste ámbito e poder cubrir os postos que se ofertan nos veráns para traballar como socorristas nas praias. Dixo que con esta actividade formativa se pretende dar solución a este problema, achegando a formación a Rianxo e facéndoa máis accesible ás persoas do ámbito da actividade física e do deporte, co obxecto de que complementen a súa formación e adquiran capacitación para traballar como socorristas, tanto en espazos acuáticos naturais coma en piscinas.

Óscar Rial destacou que desde a piscina acostuman a ter problemas para atopar traballadores con esta formación, polo que van colaborar no desenvolvemento do curso.

Ramón Villanustre debullou os aspectos técnicos do curso e a información sobre a matrícula, que se pode atopar nas seguinte ligazóns:

• Ligazón á FESSGA.
• Ligazón á nova na web do Concello de Rianxo.