O  Concello de Rianxo quere, deste xeito, lembrar a figura da escritora galega, ante a imposibilidade de realizar homenaxes públicas. - Día Rosalía de Castro 2021: os seus poemas musicados recollidos nunha lista de reprodución do YouTube - Concello de Rianxo

O vindeiro 24 de febreiro conmemórase o día da nosa gran poeta nacional, Rosalía de Castro. Todos os anos, o Concello de Rianxo adoita realizarlle unha homenaxe pública nas rúas e prazas da vila, mais este ano a emerxencia sanitaria provocada pola COVID-19 impídenos celebrar actos nos que participe xente.

Así, nesta ocasión, recomendamos que o vindeiro día 24, escollades a seguinte lista de reprodución de vídeos do YouTube onde diferentes artistas interpretan os poemas de Rosalía de Castro: máis de 40 artistas, máis de tres horas de música onde están presentes practicamente todos os estilos musicais posibles: rock, rap, trap, jazz, heavy, cantautor@s... desde Amancio Prada ata Joan Baez, pasando por Aid, Abe Rábade, Uxía, Guadi Galego, Son Trío, Astarot, Luz Casal e incluso algunhas rianxeiras: Aida Saco, Carapaus...

• https://youtube.com/playlist?list=PLh5xocokVD9CbJE90F5mLlfX2SRXvHdWs​​​​

Ademais desta homenaxe que podemos renderlle a Rosalía sen saír da casa, o Concello de Rianxo colaborará co Equipo de Dinamización Lingüística do IES Félix Muriel coa edición dun caderno onde se recompilan diferentes textos da escritora padronesa e que o alumnado e profesorado do centro empregará para facer unha lectura confinada o propio día 24. Ademais, dentro do ciclo Camiñando entre mulleres, programa de dinamización lingüística organizado conxuntamente entre o instituto rianxeiro e o Servizo de Normalización Lingüística do Concello que pretende visibilizar o traballo de mulleres destacadas que empregan de forma habitual a nosa lingua, o alumnado poderá escoitar vía teleconferencia á profesora da Universidade de Barcelona, María Xesús Lama, premio nacional de ensaio grazas ao seu estudo Rosalía de Castro. Cantos de independencia e liberdade (1837-1863), editado por Galaxia en 2017​​​​​​​.

Outras homenaxes: ao redor de todo o país distintas entidades, asociacións, centros de ensino etc., celebrarán a figura de Rosalía, mais entre todas elas debemos destacar a organizada pola Fundación Casa Rosalía de Castro, que nos anima a cociñar o Caldo de Gloria na casa e unirse á Alborada á Rosalía:

• https://rosalia.gal/que-facemos/axenda/dia-de-rosalia-2021/