- Fase local do CLUB DE DEBATE 2018 en Rianxo - Concello de Rianxo

O vindeiro sábado 7 de abril, o auditorio de Rianxo acollerá a FASE LOCAL do Club de Debate 2018, na que participarán, canda o alumnado do IES Félix Muriel, equipos dos IES de Pontevedra, Marín e Dodro.

Nesta xornada da fase comarcal en Rianxo, que comeza ás 9.30 h e que se prolongará durante todo o sábado, participan dous equipos do IES Félix Muriel, formados por 10 alumnas e alumnos cada un, e coordinados por tres profesoras do centro que se encargan da súa preparación.

A organización e as necesidades do certame están xestionadas polo Servizo de Normalización Lingüística do Concello de Rianxo, en colaboración cos SNL dos outros concellos participantes.

Nesta fase local participan 8 equipos que realizarán dous debates cada un, defendendo posturas a favor e en contra do argumento escollido para o debate nesta fase local: “A mocidade tamén ten comportamentos machistas”. Serán valorados por un xurado externo, proposto pola organización, formado por cinco persoas do ámbito da normalización lingüística, a docencia e o xornalismo.

O CLUB DE DEBATE é un proxecto de dinamización lingüística entre a mocidade, que ten como finalidade contribuír ao uso oral da lingua galega, e practicar habilidades comunicativas e de relación interpersoal, que promove a reflexión, o respecto, o intercambio de opinións, a tolerancia e o traballo en equipo. O debate ten un formato de concurso que se desenvolve en fases comarcais das que saen dous equipos gañadores, que recibirán senllos premios e que participarán na final galega do Club de Debate 2018, que se celebrará en Ferrol o 5 de maio.