Rianxo acolleu esta I Asemblea Xeral, ao exercer a presidencia nos dous primeiros anos de existencia da asociación fundada o pasado mes de febreiro en Santiago de Compostela. - I Asemblea Xeral da Asociación de Entidades Locais pola Lingua Galega - Concello de Rianxo

O pasado martes tivo lugar no Auditorio de Rianxo a I Asemblea Xeral da Asociación de Entidades Locais pola Lingua Galega, asociación que se fundou o pasado mes de febreiro en Santiago de Compostela e que está formada por 15 concellos galegos que pretenden desenvolver proxectos conxuntos no ámbito da normalización do idioma.

O Concello de Rianxo, que exercerá a presidencia durante os dous primeiros anos, acolleu a representación política e técnica dos demais concellos que pertencen á asociación: A Baña, A Coruña, Ames, Ferrol, Moaña, Narón, O Grove, Ponteceso, Pontevedra, Ribadeo, Rois, Santiago de Compostela, Teo e Vilagarcía de Arousa. Esta primeira Asemblea Xeral serviu para aprobar a adhesión de dúas novas entidades socias: os concellos de Betanzos e Redondela, e sobre todo, para determinar cal vai ser o xeito de organizar o traballo da asociación.

Os concellos que forman parte da asociación xa viñan colaborando xuntos en proxectos de promoción da lingua galega, como son os casos do Apego (primeira infancia), o certame Youtubeir@s (tecnoloxías e comunicación) ou o Club de Debate (mocidade). O obxectivo da asociación é promover a colaboración entre as distintas institucións para lograr unha xestión máis eficaz e unha redución considerable nos custos destes e doutros proxectos en materia de lingua, co fin de que poidan estenderse ao conxunto da cidadanía galega.