- PRENDE NO COLO, con Luís Prego - Concello de Rianxo

Comezamos coas actividades programadas para as familias do Apego, cun obradoiro musical infantil da man do músico, bailador e profesor de música e baile tradicional, Luís Prego.

PRENDE NO COLO é o título deste obradoiro destinado a familias con crianzas de 0 a 5 anos, no que aprenderemos cancións de berce para arrolar ás máis pequenas, pero tamén xogos e cancións infantís para implicar e axudar ás familias no proceso de aprendizaxe e de transmisión da nosas tradicións e da nosa lingua; dende cancións para aprender as partes do corpo, a xogos de descuberta e recitados sinxelos.

Esta é a primeira actividade, organizada polo Servizo de Normalización Lingüística, recentemente constituído no Concello de Rianxo, dentro do programa Apego, un programa colaborativo que desenvolven 23 concellos de Galicia e que promove a socialización en galego da primeira infancia e procura a transmisión da nosa lingua dende o ámbito familiar.

A asistencia ao obradoiro é de balde, pero cómpre inscribirse no propio Servizo de Normalización Lingüística, no primeiro andar da Casa do Concello, ou a través do correo electrónico normalizacion@concelloderianxo.gal ou do teléfono 981860075.

Nesa mesma sesión, as familias inscritas no programa Apego no Concello de Rianxo que aínda non recibiron a caixa-agasallo de benvida, terán a oportunidade de recollela.

IMAXES DA ACTIVIDADE