O alumnado do curso acudirá ás probas Celga que a Xunta de Galicia convocou para esta e a vindeira fin de semana. - Remate do curso de acollemento e integración lingüística - Concello de Rianxo

A concelleira de Educación e Normalización Lingüística, Adelina Ces Quintáns, entregou onte no Auditorio de Rianxo os diplomas que certifican a asistencia do alumnado ao Curso de acollemento e integración lingüística que impartiu ao longo deste mes de setembro Tono Formoso, profesor da Cooperativa Fabaloba.

Este curso básico de lingua e cultura galega serviulle ao alumnado para preparar as probas Celga que se van celebrar proximamente en Santiago de Compostela. O certificado Celga facilitaralle ao alumnado o acceso a postos de traballo e a listaxes de contratación públicas.

Arxentina, Canadá, Andorra, Euskadi, Rumanía... son algunhas das orixes do alumnado ao curso que agradeceu ter a oportunidade de aprender un chisco sobre a nosa lingua e a nosa cultura. Despois desta experiencia, a maioría pretende continuar coa súa formación cultural e lingüística.

O curso tivera que ser interrompido por mor da COVID-19 no mes de marzo, mais retomouse neste mes de setembro, para o que se tiveron que cumprir as medidas de seguridade sanitarias recomendadas: espazo de metro e medio entre o alumnado, uso de máscaras e limpeza e desinfección de mans e obxectos de traballo.