- Charla sobre afectividade e sexualidade: "Quen dixo medo?" - Concello de Rianxo

Dentro da  campaña de sensibilización contra a violencia de xénero "QUEN DIXO MEDO?", a Deputación da Coruña vai organizar unha charla sobre afectividade e sexualidade que terá lugar no Concello de Rianxo na seguinte data:

• Día: sábado 19 de agosto de 2017
• Horario: de 11:00 a 13:00 horas
• Lugar: Auditorio de Rianxo

A sexualidade e a afectividade son dúas facetas fundamentais na vida das persoas, que cobran especial relevancia na etapa da adolescencia. Estas charlas van encamiñadas a xerar un espazo no que se proporcione a información precisa para disipar as dúbidas dos mozos e das mozas, e axudalos no desenvolvemento, o coñecemento, a autonomía e a adquisición das habilidades precisas para acadar unha sáude sexual integral, baseada na igualdade, o respecto e a responsabilidade.

OBXECTIVOS:

• Eliminar crenzas e prexuízos infundados arredor da sexualidade.
• Desenvolver unha actitude de naturalidade, entendendo esta como unha forma de comunicación humana, fonte de saúde, pracer, afecto e, cando así se desexe, de reprodución.
• Establecer claves e pautas para o diálogo sobre temas sexuais no interior do núcleo familiar.
• Desenvolver unha ética social, onde as relacións se baseen na igualdade, no respecto e na responsabilidade.
• Abordar a diversidade sexual e de xénero para transformar a sociedade e acadar a aceptación de calquera forma de ser, con iguais dereitos, liberdades e oportunidades.

METODOLOXIA:

• Empregarase unha metodoloxía activa e participativa que involucre ao máximo ás e aos asistentes.
• Comezarase cunha exposición do persoal profesional para abrir posteriormente un espazo de preguntas sobre o tema abordado.

PERSOAS DESTINATARIAS:

Esta charla está dirixida ao público en xeral e non precisa de inscrición previa.