Obra gañadora no 4º Certame Manuel María de Proxectos Teatrais - Teatro, Berenguela na gaiola por Xarope Tulú e Galeatro - Concello de Rianxo

Teatro, Berenguela na gaiola por Xarope Tulú e Galeatro

• DÍA: sábado 15 de novembro
• HORA: 19:00 h
• LUGAR: sala Arcos Moldes do Auditorio de Rianxo
• PÚBLICO DESTINATARIO: familiar, para crianzas a partir de 6 anos
• DURACIÓN: 50 minutos
• ENTRADA: de balde ata completar capacidade do espazo. Retirada de convites, dende unha hora antes do comezo da función na billeteira do auditorio (máximo 2 por persoa)
• SITIO WEB DO ESPECTÁCULO: https://urdime.gal/espectaculos/Berenguela-na-gaiola/

Ao abeiro do Programa Rede Cultural da Deputación da Coruña.

“Todo o mundo podía reclamar para si a condición de neno” (Manuel María)

Nunha residencia da Terceira Idade traen de volta a Berenguela, unha anciá que aproveita para fuxir en canto pode. Quere volver á súa casa na aldea, onde sempre viviu, onde é feliz. Berenguela protesta, rosma, funga, ata que a súa amiga Aurora consegue acougala. Aurora é outra anciá prisioneira, unha anciá que non lembra ben quen é, así que pode ser o que ela queira. Na mesma residencia está Tomás, que pasa o día mirando pola xanela, cismando nas súas cousas, triste e gris.

Berenguela propón unha revolta, que se volvan salvaxes e perigosas, pero Aurora suxire que fagan no teatro o que non lles deixarían facer na realidade. Cre lembrar que foi actriz e que hai unha peza co nome de Berenguela. Berenguela coñece a peza, por iso leva o seu nome. As dúas enredan a Tomás e Tomás déixase enredar. No teatro atopan a liberdade que cren perdida, a posibilidade de cambiar o mundo, ou, polo menos, o seu mundo.

Así comeza a representación da peza: “Aventuras e desventuras dunha espiña de toxo chamada Berenguela”, onde cadaquén escolle o personaxe que quere representar. Irán entrando e saíndo das escenas, debatendo, interrompendo o desenvolvemento da peza, xogando coma nese pasado que crían esquecido porque aconteceu moitos, moitos anos atrás, na ilusión da nenez.